Kirkens SOS Møre og Romsdal får Vaksenopplæringsprisen 2025
– Juryen vurderer Kirkens SOS Møre og Romsdal som den best kvalifiserte kandidaten til årets pris
Kirkens SOS Møre og Romsdal er tildelt Vaksenopplæringsprisen 2025.
Prisen blir kvart år delt ut av Voksenopplæringsforbundet (Vofo) i Møre og Romsdal, i samarbeid med fylkeskommunen. Prisen skal løfte fram personar, lag eller institusjonar som brukar læring til å skape positiv endring for seg sjølv eller andre.
– Juryen vurderer Kirkens SOS Møre og Romsdal som den best kvalifiserte kandidaten til årets pris, heiter det i grunngjevinga.
Juryen framhevar særleg den systematiske opplæringa som organisasjonen gir sine frivillige for å sikre nødvendig kompetanse i møte med menneske i krise. Gjennom eit gjennomarbeidd læringsløp som kombinerer teoretisk kunnskap med praksis under rettleiing av erfarne fadderar, byggjer Kirkens SOS eit sterkt fagleg og menneskeleg grunnlag hos sine medarbeidarar.
– Denne måten å arbeide på gjer at organisasjonen har frivillige som både ser, støttar og styrkjer dei som tek kontakt. Det er ein krevjande og ansvarsfull funksjon, og Kirkens SOS løyser dette på ein førebiletleg måte, seier juryen.
Om prisen
-Voksenopplæringsprisen i Møre og Romsdal blir delt ut årleg av Vofo, i samarbeid med fylkeskommunen, og er forankra i samarbeidsavtalen mellom partane, seier Vofo sin rågjevar i Møre og Romsdal Ragnar Johansen.
- Prisen går til enkeltpersonar, foreiningar, bedrifter eller institusjonar som har brukt læring til å skape positiv endring – for seg sjølv, for andre eller for lokalsamfunnet.
Årets tildeling til Kirkens SOS Møre og Romsdal løfter fram verdien av frivillig læring, kompetansebygging og medmenneskeleg engasjement – heilt i tråd med Vofo sitt samfunnsoppdrag om å fremje læring, demokrati og deltaking.
Den høgtidlege prisutdelinga skjer på konferansen Identitet og arbeidsglede heile livet, fredag 14.november 2025.
Der er framleis nokre ledige plassar på konferansen - påmelding snarast til mr@vofo.no.