Frivillighetens betydning for å redusere utenforskap

Frivilligheten som kraft mot utenforskap

Vofo bidro på NAVs fylkeskonferanse for ungdomsteamene i Møre og Romsdal

NAV sine ungdomsteam i Møre og Romsdal var 12. - 13. november samla til fylkeskonferanse i Molde. Temaet var korleis ulike aktørar kan samarbeide for å støtte ungdom som står utanfor skole og arbeid. Vofo var invitert for å løfte fram frivilligheita si rolle i dette arbeidet – og for å dele erfaringar frå prosjektet Unge vaksne i opplevd utanforskap.

Vofos fylkesrådgivar i Møre og Romsdal, Ragnar Johansen, opna konferansen ved å synleggjere det store bidraget studieforbund og medlemsorganisasjonar gjer i regionen.

Han peikte på korleis frivillig læring skapar meistring, fellesskap og nye moglegheiter – heilt i kjernen av Vofo sin visjon om å utvikle samfunnet gjennom læring.

Medlemsorganisasjonane delte inkluderingsarbeid frå praksis

Fleire av studieforbunda sine medlemsorganisasjonar bidrog med innlegg:

• Romsdal og Sunnmøre DNT ved Ragnor Bruvoll Alme, Eli Marie Furset og Lasse Hoel, fortalte om korleis friluftsliv, aktivitet og felles opplevingar kan gi ungdom tilhøyrsle, ansvar og nye sosiale nettverk.
• Røde Kors ved Terry Senior, presenterte arbeidet retta mot ungdom og unge vaksne – særleg gatemekling som verktøy for konfliktløysing, tryggleik og eigenkraft.
• Norges Jeger- og Fiskerforbund ved Kristian Kalmyr, delte korleis jakt, fiske og naturbruk kan bidra til meistring og fellesskap.

• Forum for Natur og Friluftsliv ved Ingebjørn Bredelie, og Risken sopp- og nyttevekstforening ved Øystein Nergård, presenterte korleis aktivitetane deira skapar inkluderande møteplassar i naturen.

NAVs Terje Rolen leia konferansen vidare og knytte organisasjonane sine erfaringar saman med NAV sitt arbeid.

Samarbeid som nøkkel til deltaking

Eit sentralt spørsmål på konferansen var korleis frivillige organisasjonar kan bidra til å aktivisere ungdom på dagtid. Svaret frå organisasjonane var tydeleg: Ja – det er mogleg, og viljen er stor.

Studieforbunda og medlemsorganisasjonane deira tilbyr eit mangfald av aktivitetar, kurs og møteplassar som kan gi ungdom struktur, meistring og nye fellesskap. Dette er heilt i tråd med Vofo sin strategi om å fjerne hinder for deltaking og motverke utanforskap gjennom læring, demokrati og deltaking.

Vidare samarbeid

Vofo ser fram til å utvikle samarbeidet med NAV Møre og Romsdal. Med frivilligheita si breidde og NAV sitt oppdrag for unge, finst det eit stort potensial i å samskape gode, trygge og inkluderande arenaer for ungdom som treng ein ny start.